當70後嗌捱得辛苦、80後嗌無機會，咁香港嘅年輕人，到底仲有無明天呢？「係香港社會氣氛有問題，令佢哋覺得香港只有兩三個行業！」年僅36歲嘅吳傑莊，喺2000年獲選「香港十大數碼傑出青年」，靠 IT搵到第一桶金，要留意，係無家底、無靠山、肯蝕底、識爭取、夠毅力，完全獅子山下最典型嗰隻奮鬥故事，「最幫到自己嘅就係自己！」
公屋長大嘅吳傑莊，係專研人面識別技術嘅鈦極科技嘅創辦人，公司喺美國上市，「我對自己有要求，大學嗰陣，大家同學傾偈，我自己呢，就想有間上市公司！」無夢想嘅人，同一條鹹魚無分別，後生仔，諗頭真係不妨大一啲。
「創業最緊要堅持 肯蝕底」
成功，當然唔係必然，尤其你唔係阿邊個富豪個仔。吳傑莊當年係搞生物識別嘅，2003年嗰陣，佢開發嘅 FaceOK，喺美國最大嘅 IT展覽 COMDEX贏咗 Best Of Comdex，當年膽粗粗去參展，都係自己慳住使，一手包辦咁起程。後尾，公司上埋市再賣埋，家佢最鍾意互聯網，而淘至尊，就係一個科技含量極高嘅網上商店，而且仲應用咗大量面相識別技術。
「其實創業最緊要堅持，肯蝕底，剛剛出嚟創業，你會遇到好多唔知係咪機會嘅機會，每次你都驚俾人搵笨嘅話，咁你會錯失好多機會。」佢又補充，「與人共事先學吃虧，做落去你保持到自己信用，人哋係會賞識你嘅。」但時下大部份年輕人似乎無呢種心態，「呢一代嘅後生仔可能比我哋聰明得多，可能計算得比較準確，計有無利潤，但咁就短視同影響佢哋長遠發展。」
所以，佢極之反對香港無機會呢個講法，「後生仔覺得無希望，係因為只睇到金融地產呢啲已經俾人開發晒、飽和晒嘅行業，其實互聯網嘅世界有大把機會，係地產同金融嘅前輩唔識做嘅，而互聯網產生嘅生意，機會更加係無遠弗屆……」
吳傑莊拍到黃英豪有人話好彩，查實兩人十幾年前喺天津考察度認識，就算惺惺相惜，都先經過一段長時間嘅觀察至合作，與其話吳傑莊好彩，不如話兩人都識得把握機會，搵個幫到自己手嘅人做 partner。咁吳傑莊又係咪順風順水？
「嗰陣集咗資返來公司就要請人，自己又未打過工，把握唔到打工心態，搞到好多人要走，咪即刻補鑊學點管理囉……」所以，成功同失敗，其實同你係幾多十後無關嘅！
來源：https://hk.finance.appledaily.com/finance/daily/article/20110404/15134649